Hurmatli mutaxassislar!

O‘zbekiston Respublikasi sog‘liqni saqlash vazirining 2025-yil 30-dekabrdagi 18-son buyrug‘i bilan tasdiqlangan “Dori vositalari ustidan farmakologik nazoratni amalga oshirish va tibbiy buyumlar xavfsizligini monitoring qilish tartibi to‘g‘risidagi nizom”ga muvofiq (O‘zbekiston Respublikasi Adliya vazirligi tomonidan 2026-yil 12-yanvarda 3752-son bilan davlat ro‘yxatidan o‘tkazilgan), nojo‘ya reaksiyalar yuzaga kelgan taqdirda aniqlangan holat bo‘yicha xabarnoma belgilangan muddatlarda yozma shaklda yoki elektron formatda rasmiylashtirilib, yuborilishi lozim.

Nojo‘ya reaksiya — bu dori vositasining ta’siri natijasida o‘limga olib keladigan, bemor hayotiga xavf tug‘diradigan, gospitalizatsiyani yoki uning uzaytirilishini talab qiladigan, mehnat qobiliyatining barqaror yo‘qotilishi yoxud nogironlikka sabab bo‘ladigan, shuningdek tug‘ma anomaliyalar yoki rivojlanish nuqsonlariga olib keladigan yoxud klinik jihatdan ahamiyatli hodisa sifatida baholanadigan holatdir. Mazkur ma’lumot nizom terminologiyasida ko‘rsatilgan.

Dori vositalari ishlab chiqaruvchilari va ro‘yxatdan o‘tkazilganlik guvohnomasi egalari O‘zbekiston Respublikasi hududida dori vositasini qo‘llash vaqtida yoki qo‘llangandan keyin nojo‘ya reaksiyalar yoxud dori vositasining samarasizligi aniqlanganligi to‘g‘risida ma’lumot olgan taqdirda, ularning mas’ul xodimlari dori vositasini qo‘llash bilan bog‘liq barcha nojo‘ya reaksiyalar yoki samarasizlik holatlari bo‘yicha xabarnomani quyidagi muddatlarda rasmiylashtirishi hamda uning vakolatli organga yuborilishini ta’minlashi lozim:

— inson o‘limiga olib keladigan yoki uning hayotiga xavf tug‘diradigan nojo‘ya reaksiyalar aniqlanganda — ushbu holat qayd etilgan vaqtdan boshlab 1 kun ichida;

— bemorni davolash-profilaktika muassasasiga gospitalizatsiya qilishni yoki gospitalizatsiya muddatini uzaytirishni talab qiladigan, mehnat qobiliyatining barqaror yo‘qotilishi yoki nogironlikka, shuningdek tug‘ma anomaliyalar yoxud rivojlanish nuqsonlariga olib keladigan nojo‘ya reaksiyalar aniqlanganda — ushbu holat qayd etilgan vaqtdan boshlab 15 kun ichida;

— inson organizmi uchun zararli bo‘lgan boshqa nojo‘ya reaksiyalar aniqlanganda — ushbu holat qayd etilgan vaqtdan boshlab 60 kun ichida.

— samarasizlik aniqlanganda — ushbu holat qayd etilgan vaqtdan boshlab 30 kun ichida.

Dori vositasiga nisbatan nojo‘ya reaksiya aniqlanganda xabarnoma kartasi shaklini to‘ldiring.

Xabarnomani yuborish uchun xabarnoma kartasi shaklini yuklab olib, uni to‘ldirish lozim. Mazkur shakl dori vositalariga nisbatan nojo‘ya reaksiyalar, jiddiy nojo‘ya reaksiyalar hamda dori vositalarining samarasizligi holatlari to‘g‘risidagi xabarnoma kartasi hisoblanadi.

Word formatida to‘ldirilgan xabarnoma kartasi shakllarini farmakonadzor@ssv.uz elektron pochta manziliga yoki quyidagi manzilga yuboring: 100002, Toshkent shahri, Ozod ko‘chasi, K. Umarov tor ko‘chasi, 16-uy.

Nojo‘ya reaksiya yuzaga kelganligi to‘g‘risidagi xabarnomani elektron shaklda yuborish uchun https://pharm.gov.uz/ru/open-data/pharmacovigilance elektron veb-resursiga (portaliga) o‘tib, tegishli ma’lumotlarni to‘ldirish lozim.

Farmakonazorat bilan bog‘liq masalalar yuzasidan +998 (71) 203-01-01 telefon raqami orqali murojaat qilishingiz mumkin: ichki raqamlar — 2357, 2353, 2365.

---

Preparatni qo'llashda aniqlangan salbiy reaktsiya haqida xabar berish uchun karta shakli.

---