Davlat farmakopeyasi dori vositalari sifati va xavfsizligining mezoni: yangi talablar va amaliy yechimlar

10 mart kuni “Farmatsevtika mahsulotlari xavfsizligi markazi”da “Davlat farmakopeyasi amaliyotga joriy etish: muammolar va ularning oldini olish” mavzusida vebinar bo'ldi. Tadbirda 200 dan ortiq mutaxassis ishtirok etdi. Davlat farmakopeyasi talablari, dori vositalarini davlat ro'yxatidan o'tkazish jarayonlari hamda sifat nazorati mavzulari muhokama qilindi. Ariza beruvchilarning kamchiliklarini oldini olish yuzasidan ham tavsiyalar berildi. Tadbir yakunida ishtirokchilar savollar berdi va ular javob topdi.

Joriy yilning 5-mart kuni O‘zbekiston Respublikasi Prezidenti Shavkat Mirziyoyev tomonidan farmatsevtika sohasini yanada rivojlantirish, mahalliy dori vositalarini amaliyotga joriy etishni jadallashtirish, yaratilayotgan dori vositalarni samaradorligi, sifati va xavfsizligini kafolatlash ishlarini yanada takomillashtirish masalalarida o‘tkazilgan yig‘ilishda berilgan topshiriqlar ijrosini taʼminlash maqsadida 10 mart kuni «Farmatsevtika mahsulotlari xavfsizligi markazi» davlat muassasasida “O‘zbekiston Respublikasi Davlat farmakopeyasini amaliyotga joriy etish: muammolar va ularning oldini olish” mavzusida gibrid shakldagi vebinar bo‘lib o‘tdi.

Tadbirda Markaz direktori o'rinbosari Mirzohidjon Qodirov boshchiligida muassasaning tegishli tarkibiy bo‘linmalari, Dori vositalarini standartlash ilmiy markazi hamda Markazning Andijon, Qarshi, Samarqand va Urganch filiallaridan 200 ga yaqin mutaxassislar ishtirok etdi.

Yig‘ilish davomida kun tartibidagi muhim masalalar yuzasidan maʼruzalar tinglandi. Xususan, Davlat farmakopeyasi 2-nashri 1-jildining tuzilishi, mahalliy va xorijiy dori vositalarini davlat ro‘yxatidan o‘tkazish uchun taqdim etiladigan meʼyoriy hujjatlarni tayyorlash hamda ularni ixtisoslashtirilgan ekspertizadan o‘tkazish jarayonlari atroflicha muhokama qilindi. Shuningdek, sinovlar jarayonida Davlat farmakopeyasining amaldagi nashri talablariga rioya etish va ularning ustuvorligini taʼminlash masalalariga alohida eʼtibor qaratildi.

Vebinarda Vazirlar Mahkamasining 2025 yil 24 noyabrdagi 738-son qarori bilan tasdiqlangan Nizom talablariga to‘xtalib o‘tilib, korxona farmakopeya maqolalariga muayyan ishlab chiqaruvchining dori vositasining sifatiga doir texnik talablarni belgilovchi asosiy meʼyoriy hujjat hisoblanishi, sifat nazorati va KFM loyihasini ishlab chiqish jarayonida O‘zbekiston Respublikasi Davlat farmakopeyasining talablari ustuvorligi va sinov usullariga tegishli iqtiboslar kiritilishi zarurligi taʼkidlandi.

Shu bilan birga, dori vositalarini davlat ro‘yxatidan o‘tkazishda ixtisoslashtirilgan ekspertiza jarayonining bosqichlari, korxona farmakopeya maqolasi loyihasini ko‘rib chiqish, ariza beruvchilarning ish jarayonida ko‘p yo‘l qo‘yiladigan kamchiliklari va uni oldini olish bo‘yicha tavsiyalarni berib o‘tildi.

Tadbir yakunida, yig‘ilish ishtirokchilari o‘zlarini qiziqtirgan savollarni berdilar va maʼruzachilar tomonidan ularga atroflicha javob taqdim etildi.