Farmakopeya qoʻmitasi

Nuridullaeva.K.N.- Farmakopeya qo'mitasi raisi
Farmakopeya qoʻmitasi Oʻzbekiston Respublikasi Sogʻliqni saqlash vazirligining rasmiy ekspert organi hisoblanadi.
Farmakopeya qo‘mitasining tashkiliy tuzilmasi:
Farmakopeya qo'mitasi Prezidiumi.
Shtatda 26 nafar xodim, jumladan, 4 nafar fan nomzodi faoliyat yuritadi.

Farmakopeya qoʻmitasi vazifalari:

  • roʻyxatdan oʻtkazish va roʻyxatdan oʻtkazilganlik guvohnomasini amal qilish muddatini uzaytirishga taqdim etilgan dori vositalarining normativ hujjatlari ekspertizasi;
  • dori vositalari sifatini oshirish va sifat nazorati usullarini takomillashtirish maqsadida normativ hujjatlarini muntazam ravishda koʻrib chiqish;
  • normativ hujjatga oʻzgartirish va qoʻshimchalar kiritish yuzasidan ekspertiza qilish va ularni tasdiqlash uchun tayyorlash;
  • dori vositalarini standartlashtirish sohasida xalqaro ilmiy-texnik hamkorliklarda ishtiriok etish;
  • Oʻzbekiston Respublikasi Davlat farmakopeyasini chop etishga tayyorlash;
  • dori vositasi sifatiga talablar boʻyicha tartibni belgilaydigan standartlarni ishlab chiqish va tasdiqlashga tayyorlash dori vositalariga davlat standartlari OʻzDSt loyihalari ekspetizasi, xulosa tayyorlash va kelishish.

Oʻzbekiston Respublikasi Vazirlar Mahkamasining 2018-yil 23-martdagi 213-son qorori bilan tasdiqlangan Dori vositalari, tibbiy buyumlar va tibbiy texnikani davlat roʻyxatidan oʻtkazish hamda roʻyxatdan oʻtkazilganlik guvohnomasi berish tartibi toʻgʻrisida Nizomga muvofiq:

  • dori vositalari roʻyxatdan oʻtkazish hujjatlarining maʼmuriy, kimyoviy, farmatsevtik va biologik qismlarini, laboratoriya sinovlari bayonnomalarini ekspertizadan oʻtkazadi;
  • milliy va xalqaro standartlar talablari bilan muvofiqlashtirish maqsadida ariza beruvchidan normativ hujjatlarga muqobil usullarni va (yoki) qoʻshimcha koʻrsatkichlar, normalar va sinov usullarini kiritishni talab qiladi;
  • mustaqil ekspertlarni jalb etgan holda dori vositalari va (yoki) farmakologik vositalarning hujjatlarini ekspertizadan va takroriy ekspertizadan oʻtkazadi;
  • qoʻshimcha sinovlar oʻtkazish uchun Davlat markazining laboratoriyalariga dori vositasining namunalari va hujjatlarini yuboradi;
  • dori vositalari va tibbiy buyumlarning normativ hujjatlarini tasdiqlaydi;
  • taqdim etilgan hujjatlar va ekspertlar xulosalari asosida dori vositalarini roʻyxatdan oʻtkazish yoki roʻyxatdan oʻtkazishni rad etish toʻgʻrisidagi tavsiyalarni belgilangan tartibda Oʻzbekiston Respublikasi Sogʻliqni saqlash vazirligi tomonidan tashkil etilgan Ekspertlar kengashiga (keyingi oʻrinlarda Ekspertlar kengashi deb ataladi) kiritadi.

Farmakopeya qoʻmitasi Oʻzbekiston Respublikasida dori vositalari muomalasini tartibga solish boʻyicha JSST bilan muntazam ravishda aloqa qiladi, farmatsevtika va sogʻliqni saqlash boʻyicha MDH davlatlari va xorijiy davlatlar bilan hamkorlik qiladi.

Oʻzbekiston Respublikasining “Dori vositalari va farmatsevtika faoliyati toʻgʻrisida”gi Qonunining 8-moddasiga muvofiq,

“Umumiy farmakopeya maqolalarini, farmakopeya maqolalarini ishlab chiqish va ularni Davlat farmakopeyasiga kiritish Farmakopeya qoʻmitasi tomonidan belgilangan tartibda amalga oshiriladi. Farmakopeya qoʻmitasi Oʻzbekiston Respublikasi Sogʻliqni saqlash vazirligining rasmiy ekspert organidir.

Davlat farmakopeyasi Oʻzbekiston Respublikasi Sogʻliqni saqlash vazirligi tomonidan besh yilda kamida bir marta chop etiladi. Davlat farmakopeyasining qayta nashrlari oraligʻidagi davrda Davlat farmakopeyasiga ilovalar chop etiladi”.

Oʻzbekiston Respulikasi Sogʻliqni saqlash vazirining 2020-yil 28-avgustdagi 227-son buyrugʻiga asosan OʻZbekiston davlat farmakopeyasining 1 nashri, 1 jildi tasdiqlandi..

Oʻzbekiston Respublikasi davlat farmakopeyasiga kiritish maqsadida Farmakopeya qoʻmitasi umumiy farmakopeya maqolalarini tasdiqlagan. 

Masalan:

  • Bakterial endotoksinlar –OFS 42 Uz-0001-1010-2020;
  • Gistaminga oʻxshash moddalar miqdorini aniqlash – OFS 42 Uz- 0002-1904-2017;
  • Pirogenlik – OFS 42 Uz-0003-2338-2016;
  • Anomal zaharlilik - OFS 42 Uz-0004-2339-2016.

Farmakopeya qoʻmitasi tomonidan isteʼmolchilarni sifatli dori vositalari bilan taʼminlash va ularning sifatini yanada afzal qilish maqsadida ilmiy texnik progress yutuqlari eʼtiborga olingan holda normativ hujjatlarga talablar ishlab chiqilgan.

Dori vositalarining samaradorligi va xavfsizligini taʼminlash maqsadida ishlab chiqilgan talablar darajasining ortishi, texnik reglament va normativ hujjatlarning xalqaro eʼtirof etilgan Xalqaro farmakopeya, Yevropa farmakopeyasi, AQSH farmakopeyasi va boshqa farmakopeyalar bilan muvofiqlashtirish alohida ahamiyat kasb etadi. Tasdiqlangan normativ hujjatlar xalqaro talablar bilan muvofiqlashtirilgan. 

Oʻzbekiston Respublikasining “Texnik jihatdan tartibga solish toʻgʻrisida”gi  Qonunining ijrosini amalga oshira borib,  Farmakopeya qoʻmitasi tomonidan Normativ hujjatlar fondi tashkil etilgan boʻlib, unda elektron va qogʻoz variantidagi 14000 dan ortiq dori vositalari normativ hujjatlari mavjud.

Qoʻmita tomonidan mazkur Qonun ijrosi yuzasidan dori vositalariga yagona xavfsizlik talablarini belgilash maqsadida Dori vositalarining xavfsizligi toʻgʻrisidagi umumiy texnik reglament ishlab chiqilgan boʻlib, reglament Oʻzbekiston Respublikasi Vazirlar Mahkamasining 2016-yil 27-oktyabrdagi 375-son qarori bilan tasdiqlangan.


Biz bilan bog’lanish uchun:

Tel.:  99871 203-01-01

Faks:  (+99871) 242-48-25.

29.08.2023